Home | Job | Pinball | Photo Album | Automotive | Press/Awards | Contact |
ORANJESTAD (AAN): Un lokaal nobo, moderno, y bon equipa ta loke Abraham de Veerschool na San Nicolas a caba di inaugura den fin di siman. Pesey mes varios invitado y dignatario tabata presente pa ta testigo di e gran logro aki. Fuera di esey, e “Natuur & Techniek Lokaal” aki a haya un nomber apropia tambe, esta “Dr. Edward Cheung Research Center”. Esey ta bay pa e famoso cientifico Arubano kende ta trahando pa NASA na Merca. Dr. Cheung cu su famia a bin Aruba specialmente pa e ocasion aki, y tabata un momento emocional pa e cientifico mira su nomber aparece riba e lokaal aki, cu a worde construi menos di 8 meter leu for di e lokaal di e prome school cu el a haya les na dje na San Nicolas. Dr. Edward Cheung ta un persona original di San Nicolas, y pesey e school cu hopi orguyo a dedica e lokaal aki na dje. E pensamento ta cu e hobennan cu ta haya les den e lokaal aki, lo por ricibi e inspiracion necesario di e cientifico Arubano aki pa asina profundiza den e materia y ricibi extra esfuerzo pa por bay dilanti y desaroya den ciencia. Dilanti un grupo di invitado y e alumnonan yen interes, Sr. Elgin Nicolaas a haci e introduccion y a introduci despues, director Franklin Leslie kende a dirigi palabra y splica e.o. cu Dr. Edward Cheung tabata biba menos di 100 meter leu di e school, y a mustra con el a desaroya su mes. Ministro di Enseñanza tambe a ofrece un fabuloso discurso, mustrando cu esnan di Ciclo Basico lo bay haci bon uso di e N&T Lokaal aki. E sorpresa di e mainta, ta ora cu Dr. Edward Cheung a ofrece un regalo valioso pa worde poni den e lokaal, cu ta un pida hardware cu Astronautanan abordo di Space Shuttle a logra kita di Hubble Space Telescope y trece back for di espacio. Esaki a worde poni den un bunita cuadro, y awor tur alumno di Abraham de Veerschool por bisa cu nan tin pida material cu a zweef den espacio den nan Natuur en Techniek Lokaal. E lokaal mes ta uno amplio, cu varios stacion special di practica poni rond, cu acceso na awa y electricidad, pa asina haci test pa Natuurkunde, Scheikunde, y Biologia. E mainta tabata uno alegre, y DIARIO por menciona cu e himno di Aruba a worde canta pa Jessica Larmonie, y tambe tabatin baile di “The Young Girls”, consistiendo di Aisheline, Zoya, y Sabrina. DIARIO ta felicita tur docente y alumno di Abraham de Veerschool cu e joya di N&T Lokaal cu nan a haya, y cu oficialmente ta carga e nomber di “Dr. Edward Cheung Research Center”. |
Previous page (Arrival in Aruba)
Next page (under construction)
(c) 2005 Edward Cheung, all rights reserved.